「香港立法會昨日以39:1三讀通過《2021年醫生註冊（修訂）條例草案》，將在現有執業試以外，另闢免試路徑引入非本地培訓醫生。……張宇人質疑，世界各地都在吸引海外專才，特別是醫生，不明白香港仍拒人於千里。」
知唔知點解張宇人會有呢個質疑？因為佢根本從來都唔係醫護人員，佢梗係唔明白引入大量海外醫護人員對本港醫療體系衝擊有幾大！
唔同地方醫療培訓都有所不同，處理病例嘅方法未必一樣香港醫療水平世界首屈一指，究竟係咪全部人入嚟嘅海外醫護人員都有返香港醫護嘅水準？香港嘅醫院主要係應付香港人嘅醫療需要，大部分嘅病人都係講廣東話，海外醫生又係唔係聽得明講得到？
如果唔能夠確保佢哋嘅水平唔使佢哋再喺香港考牌就可以嚟香港執業，究竟對本港市民有冇潛在嘅風險？而對於我哋自己香港辛辛苦苦讀書識字考大學經過專業考試成為專業醫護人員嘅人，對我哋嚟講又係咪公平？與其引入海外醫護人員，不如諗下點樣留住本地人才，開設更多渠道培訓醫護人員改善醫院基本營運管理流程，減低前線醫護人員壓力。
今日引入海外醫生，話唔定唔使幾耐都會引入海外護士，甚至係其他醫護人員。共勉之啦朋友們。
by Jennifer H.
★ ★ ★ ★ ★ ★
